ਸ਼੍ਰੀ ਕ੍ਰਿਸ਼ਨ ਕਥਾ ਦੇ ਤੀਜੇ ਦਿਨ ਹੋਇਆ ਸ਼੍ਰੀ ਕ੍ਰਿਸ਼ਨ ਜਨਮ ਉਤਸਵ ਦਾ ਪ੍ਰਸੰਗਜਦੋਂ ਪ੍ਰਭੂ ਸਾਡੇ ਅੰਤਰ ਜਗਤ ਵਿੱਚ ਅਵਤਾਰ ਧਾਰਨ ਕਰਦੇ ਹਨ, ਤਾਂ ਸਾਡੇ ਅੰਦਰਲੀ ਅਗਿਆਨਤਾ ਦੂਰ ਹੋ ਜਾਂਦੀ ਹੈ – ਸਾਧਵੀ ਗਰਿਮਾ ਭਾਰਤੀਪਰਵਿੰਦਰ ਸਿੰਘ ਕੰਧਾਰੀ ਫਰੀਦਕੋਟ, 8 ਸਤੰਬਰਦਿਵਯ ਜਯੋਤੀ ਜਾਗ੍ਰਿਤੀ ਸੰਸਥਾਨ ਵੱਲੋਂ ਸਥਾਨਕ ਸ਼੍ਰੀ ਰਾਧਾ ਕ੍ਰਿਸ਼ਨ ਧਾਮ ਫਰੀਦਕੋਟ ਵਿਖੇ ਪੰਜ ਦਿਨਾਂ ਦਾ ਸ਼੍ਰੀ ਕ੍ਰਿਸ਼ਨ ਕਥਾ ਦਾ ਆਯੋਜਨ ਕੀਤਾ ਜਾ ਰਿਹਾ ਹੈ। ਕਥਾ ਦੇ ਤੀਜੇ ਦਿਨ ਦੀ ਸ਼ੁਰੂਆਤ ਰਸਮੀ ਪੂਜਾ ਨਾਲ ਕੀਤੀ ਗਈ ਜਿਸ ਵਿੱਚ ਪ੍ਰੇਮ ਗੇਰਾ ਜਨਰਲ ਸਕੱਤਰ ਮੇਲਾ ਰਾਮ ਗੇਰਾ ਚੈਰੀਟੇਬਲ ਟਰੱਸਟ, ਗੌਰਵ ਸੇਠੀ ਅਤੇ ਗੁਰਪ੍ਰੀਤ ਸਚਦੇਵਾ ਨੇ ਹਿੱਸਾ ਲਿਆ।ਕਥਾ ਦੌਰਾਨ ਸ਼੍ਰੀ ਆਸ਼ੂਤੋਸ਼ ਮਹਾਰਾਜ ਜੀ ਦੀ ਸ਼ਿਸ਼ ਸਾਧਵੀ ਗਰਿਮਾ ਭਾਰਤੀ ਨੇ ਇਸ ਵਿਸ਼ਾਲ ਸਮਾਗਮ ਵਿੱਚ ਭਗਵਾਨ ਦੇ ਜਨਮ ਅਤੇ ਉਨ੍ਹਾਂ ਦੇ ਜੀਵਨ ਦੀਆਂ ਲੀਲਾਂ ਵਿੱਚ ਛੁਪੇ ਅਧਿਆਤਮਿਕ ਭੇਦਾਂ ਦਾ ਖੁਲਾਸਾ ਕੀਤਾ ਜਿਸ ਵਿੱਚ ਸਾਰੇ ਧਾਰਮਿਕ ਗ੍ਰੰਥਾਂ ਦਾ ਤਾਲਮੇਲ ਸ਼ਾਮਲ ਹੈ। ਸਾਧਵੀ ਜੀ ਨੇ ਕਿਹਾ ਕਿ ਜਿਸ ਮਕਸਦ ਲਈ ਪ੍ਰਭੂ ਅਵਤਾਰ ਧਾਰਣ ਕਰਦੇ ਹਨ ਉਹ ਹਰ ਯੁੱਗ, ਸਮੇਂ ਅਤੇ ਦੇਸ਼ ਦੀਆਂ ਸੀਮਾਵਾਂ ਤੋਂ ਪਰ੍ਹੇ ਹੈ ਅਤੇ ਮੌਜੂਦਾ ਯੁੱਗ ਦੀਆਂ ਸਾਰੀਆਂ ਸਮੱਸਿਆਵਾਂ ਦਾ ਹੱਲ ਕਰਦਾ ਹੈ। ਸੰਸਾਰ ਵਿੱਚ ਉਹ ਪਰਮਾਤਮਾ ਕਾਮ, ਕ੍ਰੋਧ, ਲੋਭ, ਮੋਹ, ਹਉਮੈ ਨਾਲ ਅੰਨ੍ਹੇ ਹੋਏ ਅਤੇ ਕਈ ਤਰ੍ਹਾਂ ਦੇ ਰੋਗਾਂ, ਦੁੱਖਾਂ, ਜਨਮ, ਮੌਤ ਆਦਿ ਵਿੱਚ ਫਸੇ ਹੋਏ ਮਨੁੱਖਾਂ ਨੂੰ ਸਹੀ ਰਸਤੇ ‘ਤੇ ਵਾਪਸ ਲਿਆਉਣ ਲਈ ਅਵਤਾਰ ਧਾਰਨ ਕਰਦਾ ਹੈ। ਸਾਧਵੀ ਜੀ ਨੇ ਪਰਮਾਤਮਾ ਦੇ ਸੰਬੰਧ ਵਿੱਚ ਦੱਸਿਆ ਕਿ ਭਗਵਾਨ ਸ਼੍ਰੀ ਕ੍ਰਿਸ਼ਨ ਸੰਸਾਰ ਦੇ ਪਾਲਣਕਰਤਾ ਅਤੇ ਬ੍ਰਹਿਮੰਡ ਦੇ ਨਿਯੰਤ੍ਰਕ ਹਨ, ਜੋ ਭੌਤਿਕ ਰੂਪ ਵਿੱਚ ਅਵਤਾਰ ਧਾਰਨ ਕਰਦੇ ਹਨ। ਨਿਰਾਕਾਰ ਪਰਮਾਤਮਾ ਧਰਮ ਦੀ ਸਥਾਪਨਾ ਕਰਨ ਦੇ ਲਈ ਭੌਤਿਕ ਰੂਪ ਧਾਰਨ ਕਰਦੇ ਹਨ। ਸਾਧਵੀ ਜੀ ਨੇ ਦੱਸਿਆ ਕਿ ਸ਼੍ਰੀ ਕ੍ਰਿਸ਼ਨ ਜੀ ਦਾ ਜਨਮ ਰਾਤ ਦੇ ਸਮੇਂ ਹੋਇਆ ਸੀ ਜੋ ਸਾਡੇ ਸਾਰਿਆਂ ਲਈ ਇੱਕ ਸੰਦੇਸ਼ ਹੈ ਕਿ ਜਦੋਂ ਮੈਂ ਪ੍ਰਗਟ ਹੁੰਦਾ ਹਾਂ, ਤਾਂ ਅਗਿਆਨਤਾ ਦਾ ਹਨੇਰਾ ਦੂਰ ਹੋ ਜਾਂਦਾ ਹੈ ਅਤੇ ਜਦੋਂ ਪਰਮਾਤਮਾ ਸਾਡੇ ਅੰਤਰ ਜਗਤ ਭਾਵ ਇਸ ਸ਼ਰੀਰ ਰੂਪੀ ਮੰਦਿਰ ਵਿੱਚ ਅੰਦਰ ਪ੍ਰਗਟ ਹੁੰਦੇ ਹਨ, ਤਾਂ ਸਾਡੇ ਅੰਦਰ ਦੀ ਅਗਿਆਨਤਾ ਵੀ ਅਲੋਪ ਹੋ ਜਾਂਦੀ ਹੈ। ਫਿਰ ਸਾਡੇ ਅੰਦਰ ਗਿਆਨ ਦੀ ਰੌਸ਼ਨੀ ਪ੍ਰਗਟ ਹੁੰਦੀ ਹੈ। ਸਾਧਵੀ ਜੀ ਨੇ ਦੱਸਿਆ ਕਿ ਸ਼੍ਰੀ ਕ੍ਰਿਸ਼ਨ ਜੀ ਦਾ ਜਨਮ ਇੱਕ ਕੈਦਖਾਨੇ ਵਿੱਚ ਹੋਇਆ ਸੀ। ਇਹ ਕੈਦਖਾਨਾ ਸਾਡੇ ਮਨੁੱਖੀ ਸਰੀਰ ਦਾ ਪ੍ਰਤੀਕ ਹੈ ਜਿਸ ਵਿੱਚ ਪਰਮਾਤਮਾ ਦਾ ਵਾਸ ਹੈ। ਪਰ ਕਿਉਂਕਿ ਅਸੀਂ ਮਾਇਆ ਦੀ ਨੀਂਦ ਵਿੱਚ ਸੁੱਤੇ ਹੋਏ ਹਾਂ, ਇਸ ਲਈ ਅਸੀਂ ਉਸਨੂੰ ਨਹੀਂ ਦੇਖ ਸਕਦੇ। ਅਤੇ ਜਦੋਂ ਤੱਕ ਅਸੀਂ ਮਾਇਆ ਦੇ ਚੁੰਗਲ ਵਿੱਚੋਂ ਬਾਹਰ ਨਹੀਂ ਆਉਂਦੇ, ਅਸੀਂ ਆਪਣੇ ਅੰਤਰ ਜਗਤ ਵਿੱਚ ਉਸ ਪਰਮਾਤਮਾ ਦਾ ਦਰਸ਼ਨ ਨਹੀਂ ਕਰ ਸਕਦੇ ਅਤੇ ਨਾ ਹੀ ਉਦੋਂ ਤੱਕ ਅਸੀਂ ਮਾਇਆ ਦੇ ਜਾਲ ਵਿੱਚੋਂ ਬਾਹਰ ਆ ਸਕਦੇ ਹਾਂ। ਉਨ੍ਹਾਂ ਦੱਸਿਆ ਕਿ ਜਿਸ ਤਰ੍ਹਾਂ ਮਾਤਾ ਦੇਵਕੀ ਜੀ ਨੇ ਪ੍ਰਭੂ ਨੂੰ ਆਪਣੇ ਚਹੁੰ-ਭੁਜਾਵਾਂ ਵਾਲੇ ਰੂਪ ਵਿੱਚ ਆਪਣੇ ਹਿਰਦੇ ਭਾਵ ਆਪਣੇ ਅੰਤਰ ਜਗਤ ਵਿੱਚ ਵੇਖਿਆ ਸੀ, ਉਸੇ ਤਰ੍ਹਾਂ ਅਸੀਂ ਵੀ ਪੂਰਨ ਸਤਿਗੁਰੂ ਦੀ ਕਿਰਪਾ ਨਾਲ ਆਪਣੇ ਅੰਦਰ ਅਜਿਹਾ ਹੀ ਅਨੁਭਵ ਕਰ ਸਕਦੇ ਹਾਂ। ਨੰਦ ਮਹੋਤਸਵ ਕਾਰਨ ਪੂਰਾ ਪੰਡਾਲ ਗੋਕੁਲ ਪਿੰਡ ਵਰਗਾ ਦਿਖਾਈ ਦੇ ਰਿਹਾ ਸੀ। ਜਦੋਂ ਛੋਟੇ ਕ੍ਰਿਸ਼ਨ ਕਨ੍ਹਈਆ ਨੂੰ ਪੰਘੂੜੇ ਵਿੱਚ ਬਿਠਾਇਆ ਗਿਆ, ਤਾਂ ਸਾਰੇ ਸ਼ਰਧਾ ਨਾਲ ਨਤਮਸਤਕ ਹੋ ਗਏ ਅਤੇ ਪੂਰਾ ਪੰਡਾਲ ਬ੍ਰਿਜ ਵਾਸੀਆਂ ਵਾਂਗ ਨੱਚਣ ਲੱਗ ਪਿਆ। ਤੀਸਰੇ ਦਿਨ ਦੀ ਕਥਾ ਦਾ ਸਮਾਪਨ ਪ੍ਰਭੂ ਦੀ ਪਵਿੱਤਰ ਆਰਤੀ ਨਾਲ ਕੀਤਾ ਗਿਆ। ਇਸ ਮੌਕੇ ਬਲਦੇਵ ਸਿੰਘ ਸਾਬਕਾ ਵਿਧਾਇਕ ਜੈਤੋ, ਕੈਪਟਨ ਧਰਮ ਸਿੰਘ ਗਿੱਲ ਮੁੱਖ ਸੇਵਾਦਾਰ ਲੰਗਰ ਮਾਤਾ ਖੀਵੀ ਗੁਰੂਦੁਆਰਾ, ਗੌਰਵ ਕੱਕੜ ਜ਼ਿਲ੍ਹਾ ਪ੍ਰਧਾਨ ਭਾਜਪਾ ਵਿਸ਼ੇਸ਼ ਤੌਰ ਤੇ ਕਥਾ ਵਿੱਚ ਮੌਜੂਦ ਸਨ। ਜਦਕਿ ਨਰਿੰਦਰਪਾਲ ਸਿੰਘ ਨਿੰਦਾ ਪ੍ਰਧਾਨ ਨਗਰ ਕੌਂਸਲ ਫਰੀਦਕੋਟ, ਸਤੀਸ਼ ਗਰੋਵਰ ਜਿਲ੍ਹਾ ਪ੍ਰਧਾਨ ਅਕਾਲੀ ਦਲ, ਸੋਨੂੰ ਗਰੋਵਰ ਪ੍ਰਧਾਨ ਸਬਜੀ ਮੰਡੀ ਫਰੀਦਕੋਟ, ਐਡਵੋਕੇਟ ਅਤੁਲ ਗੁਪਤਾ, ਐਡਵੋਕੇਟ ਮੁਕੇਸ਼ ਗੌੜ, ਪੰਕਜ ਅਗਰਵਾਲ, ਮਨਪ੍ਰੀਤ ਲੂੰਬਾ, ਡਾ.ਐਨ.ਆਰ.ਗੁਪਤਾ, ਸੁਖਵਿੰਦਰ ਸਿੰਘ (ਭਲਵਾਨ), ਸੁਖਦੇਵ ਸ਼ਰਮਾ ਪ੍ਰਧਾਨ ਬ੍ਰਾਹਮਣ ਸਭਾ, ਡਾ. ਹਰਸ਼ਵਰਧਨ ਗੁਪਤਾ, ਹੰਸਰਾਜ ਸ਼ਰਮਾ, ਰਾਮਕ੍ਰਿਸ਼ਨ ਸ਼ਰਮਾ, ਗੁਲਸ਼ਨ ਅਰੋੜਾ ਤੋਂ ਇਲਾਵਾ ਮੀਡੀਆ ਤੋਂ ਪ੍ਰੇਮ ਕੁਮਾਰ ਪਾਸੀ, ਤਰਸੇਮ ਚੋਪੜਾ, ਗੁਰਜੀਤ ਰੋਮਾਣਾ, ਜਤਿੰਦਰ ਕੁਮਾਰ ਅਤੇ ਪ੍ਰਦੀਪ ਚਾਵਲਾ ਨੇ ਆਰਤੀ ਵਿੱਚ ਸ਼ਿਰਕਤ ਕੀਤੀ ਅਤੇ ਪ੍ਰਭੂ ਦਾ ਆਸ਼ੀਰਵਾਦ ਪ੍ਰਾਪਤ ਕੀਤਾ।